🚨 अत्यन्त जरुरी सूचना: कुलेखानी ड्यामको सुरक्षा साइरनबारे इन्द्रसरोवर गाउँपालिकाको सूचना

मकवानपुर — इन्द्रसरोवर गाउँपालिकाले कुलेखानी जलाशय (इन्द्रसरोवर) मा पानीको सतह बढ्दै जाँदा ड्यामको सुरक्षाका लागि बजाइने साइरनको संकेत र अपनाउनुपर्ने सावधानीबारे अत्यन्त जरुरी सूचना जारी गरेको छ।

गाउँपालिकाका अनुसार वर्षायाममा जलाशयको पानीको सतह बढ्दै जाँदा ड्यामको सुरक्षाका लागि स्पिलवे गेट (मुख्य ढोका) खोल्नुपर्ने अवस्था आउन सक्छ। यस्तो अवस्थामा ड्यामको तल्लो तटीय क्षेत्रमा बग्ने खोला तथा नदी किनार आसपासका बासिन्दाको जीवनरक्षाका लागि विभिन्न तहमा साइरन बजाएर पूर्वसूचना दिने व्यवस्था गरिएको छ।

🔊 साइरनको संकेत यसरी बुझ्नुहोस्

१ पटक लामो साइरन — पहिलो चेतावनी (First Warning)
करिब १ मिनेट लगातार साइरन बज्दा जलाशयमा पानी भरिन लागेको अवस्था जनाउँछ। यस अवस्थामा खोला किनारमा जुनसुकै उद्देश्यले जान पूर्ण प्रतिबन्ध गरिएको छ।

२ पटक साइरन — दोस्रो चेतावनी (Second Warning / उच्च सतर्कता)
करिब २ मिनेट लगातार साइरन बज्दा जलाशयको सतह उच्चतम बिन्दुमा पुगेको अवस्था जनाउँछ।
यस अवस्थामा बालबालिका, ज्येष्ठ नागरिक, अशक्त तथा गर्भवतीलाई सुरक्षित स्थानमा लैजान र देउराली–कुलेखानी–सिस्नेरी सडकखण्ड प्रयोग गर्दा विशेष सावधानी अपनाउन गाउँपालिकाले आग्रह गरेको छ।

३ पटक सानो–सानो अन्तरालमा साइरन — तेस्रो तथा अन्तिम चेतावनी (Emergency Warning / खतराको संकेत)
लगातार छोटो–छोटो अन्तरालमा ३ पटक साइरन बज्दा बाँधको मुख्य ढोका खोलिएको र नदीको सतहमा उच्च वृद्धि हुने अवस्था जनाउँछ।

यस अवस्थामा तुरुन्त खोला किनार तथा गहिरो भाग छाडेर अग्लो/सुरक्षित स्थानमा जान र देउराली–कुलेखानी–सिस्नेरी सडकखण्डमा आवतजावत नगर्न गाउँपालिकाले अनुरोध गरेको छ।

📢 गाउँपालिकाले साइरनको आवाज सुन्नासाथ सम्बन्धित चेतावनी तहअनुसार सुरक्षा उपाय अपनाउन सबैमा अनुरोध गरेको छ।

स्रोत: इन्द्रसरोवर गाउँपालिका, गाउँ कार्यपालिकाको कार्यालय
सूचना मिति: २०८३/०६/०५